Senator C/raxmaan Faroole oo iska casilay Xubinimada Guddiga Wadajirka ee Dastuurka

0

Senator C/raxmaan Sheikh Maxamed Faroole ayaa si rasmi ah u shaaciyay inuu iska casilay Xubinimadii Guddiga Wadajirka ah Dastuurka ee Baarlamaanka Labada Aqalka Soomaaliya, kaasoo todobaadkii hore uu ku guuldareystay in loo doorto Guddoomiyaha Guddiga.

Kulan ay maanta Xildhibaanada Aqalka sare ku yeesheen magaalada Muqdisho ayaa laga aqriyay warqad iscasilaad ah uu soo gudbiyay C/raxmaan Faroole, kaasoo uu ku codsanayo in laga aqbalo inuu iska casilay xubinimada Guddiga.

C/raxmaan Faroole ayaa dadaal badan ugu jiray inuu noqdo Guddoomiyaha Guddiga dastuurka labada Aqal, inkastoo uu ka guuleystay Senator Cabdi Qeybdiid.

Mr Faroole ayaa ku sugneyn Aqalka sare, xilliga laga akhrinayay warqada is casilaada iyo baaqa Guddoonka ee ku aadanaa buuxinta booskaas.

Guddoomiyaha Aqalka sare Cabdi Xaashi C/llaahi ayaa ku wargeliyay Xildhibaanada Aqalka sare in la buuxinayo kursigaas, iyadoo xubinta buuxineysa ay iska soo dhex dooran doonaan Xildhibaanada Aqalka sare oo cod loo qaadi doono.

Cabdi Xasan Cawaale Qeybdiid ayaa todobaadkii hore waxaa uu C/raxmaan Faroole kaga adkaaday 6-4 doorashada Guddoomiyaha Guddiga Dastuurka ee Labada Aqal.

Guddigana ayaa ka kooban 10 xubnood oo kala ah 5 xubnood ka socda Golaha shacabka iyo 5 xubnood oo ka socda Aqalka sare, kuwaasoo dhamaantood ah Rag.