Ciidamada ammaanka DFS oo Muqdisho ku qabtay Kooxo dhac u geysta Dadka rayidka ah.

0

Ciidamada ammaanka Dowladda Federaalka gaar ahaan Booliiska ayaa howlgallo lagu soo qabtay burcad dhac u geysatay Dad rayid ah ka sameeyay Degmooyinka Yaaqshiid iyo Kaaraan ee Gobolka Banaadir.

Shacabka kunool degmooyinkaas ayaa Ciidanka Booliiska u gudbiyay cabasho ka dhan ah Kooxo hubeysan oo Habeen iyo maalin dhac u geysta, Hay’adaha ammaanka xaafado kamid ah Yaaqshiid iyo Kaaraan kusoo qabtay Dad ku eedeysan in ay Shacab furanayeen.

Taliye ku xigeenka qaybta guud ee Booliiska Gobolka Banaadir Cali Dhuux Cabdi Mahad alla ayaa Warbaahinta u sheegay in koox dhalinyaro ah oo mid kamid ah ay tahay Haweeney oo baaris dheeraad ah lagu wado.

Waxa uu intaas ku daray in howlgalka inta uu socday lagula dagaalamayay Dhalinyarada loo yaqaan “Ciyaar weerarada” oo degmooyinkaas dhibaatooyin xooggan ka geysta, cabashadoodana la geeyay saldhigyada Booliiska.

“Waxa aan galnay howlgal aan ka sameynay Degmooyinka Yaaqshiid iyo Kaaraan oo lagu xaqiijinayo amniga guud, howlgallada ka socda Muqdisho waxaa looga hortagayaa Kooxaha nabad-diidka ah, Burcadda & dhalinyarada weerarada, waxa aan kasoo billawnay saldhigga kaaraan ilaa saldhigga Hiliwaa waan ku tagnay ilaa aan ka gaarnay saldhigga Yaaqshiid, howlgalkaas sidii loogu talagalay ayuu u dhacay waana wax sii socon doona” ayuu yiri Taliye ku xigeenka qaybta Booliiska Gobolka Banaadir Cali Dhuux Cabdi.

Degmooyin katirsan Gobolka Banaadir waxaa ka dhaca falal amni darro, Kooxo burcad ah oo qaarkood gaadiid iyo mootooyin wata ayaa Dadka u badan Ardayda waxa ay ka qaataan Telefoonnada gacanta, Kumbiyuutarada iyo agabka kale ay wataan.